CLASSICAL POEMS by Kushal Kumar Niraula

छन्दमा कविता
कुशलकुमार निरौला

छन्द: - पञ्चचामर
***************
म बन्न सक्छु शैव नै घसेर भस्म चन्दनै
म भज्न सक्छु कृष्ण नै दिएर ध्यान मन्मनै ।
म लाग्न सक्छु सत्पथै सुनेर ज्ञान गाथ नै
म माग्न सक्छु भीख नै दिलाउ मुक्ति नाथ नै ।।

छन्द:-शार्दूलविक्रीडित
*****************
आयो तीज गयो दिएर मनमा उन्मत्त हाँसो सदा।
छायो देश विदेश एक समता भूले सबै कष्टता।।
नारीले पहिरे चिटिक्क हुनमा राता र मूगा लुगा।
देब्रे काँध झपक्क तिल्लरि अहो स्वर्णादिले छाँइदा ।।

Poem by Dr. Madhu Krishna Shrestha

गद्य कविता

अज्ञात समय

डा. मधु माधुर्य

शव्द वा सूचना
जीवनको एट्रीब्युट बनिसकेपछि
विज्ञापन, सूचना, रेखांकन ...
हरेक कुराहरु शव्दबाटै
नियन्त्रित छन् हिजोआज

नखुर्मुरुन्जेल
वीरताको भूमिकामा

कहालीलाग्दो भीरको बाटो हिंडेर
युग-युगान्तर
समयलाई/ संसारलाई तर्साइरहेका छौं
केही फुटाइरहेका छौं / टुटाइरहेका छौं
कसैको अनुरोधमा
आफैलाई गिराइरहेका छौं

Poem by Dhrua Sapkota

कविता -
" प्रिय, म मन्त्री हुन सक्दिन " -

ध्रुव सापकोटा

काग भएपनि

कोइलीको गीत गाउँछ
ममा त्यो कला छैन
बाज भए पनि
परेवाका प्वाँख फिजाउँछ
म चटकी हैन प्रिय
म सक्दिन त्यसो गर्न
म मन्त्रि हुन सक्दिन !
तिमीलाई भोक लाग्छ
मलाई पनि लाग्छ नि प्रिय
तिमीलाई प्यास लाग्छ
मलाई पनि त लाग्छ नि प्रिय
तर
हाम्रो र उस्को भोकमा अन्तर छ
हाम्रो र उस्को प्यासमा अन्तर छ
उस्को पेट ठूलो हुन्छ
जती खाए पनि नअघाउने
कुम्भकर्ण हुन्छ उ !

Poem by Madhu

कविता

भ्रम

-मधु माधुर्य

मार्च -१४ ले क्यालेन्डरमा
हाराकिरी गरेको दिन -
समयले आमाको अन्जुलीभरि
केहि चल्लाहरु थमाई दियो :
आफ्नै सम्झेर पालिन् , हुर्काइन, बढाइन्
र एकदिन उडाइन् :
एकहुल हुचिल र चिलहरु तँछाड-मछाड गर्दै आकाशमा उडे
आमाले सोचेको परेवाहरु हैन रहेछन् ती ....

Pages