FREE NEPAL:Global Network of Nepali Literature

केहि सन्दर्भ मुक्तकहरु
- ध्रुव सापकोटा

१.
पाखुराको घमन्डले बद्नाम गरे केटाहरुले
गोर्खालीको नाक काटे अल्लारे फेटाहरुले
गाल पर्नु पर्‍यो लाहुरे बा को मान र शानलाई
लाप्पा खेले चौरस्तामै हङ्कङका जेठाहरुले

२.
दशैं विशेष -
"मेरो देश"
विकसित हुने फगत धोको हुँ म
आशा र आश्वासनको पोको हुँ म
सधैं कुर्सीकै लडाईं हेर्न विवश
दशैमा काटिने बोको हुँ म

३.

कविता

सौन्दर्यानुभूति

- डा. मधु माधुर्य

सदाबहार हिउँदको बर्को ओढेर
आधुनिक संसारमाझ धुमधुम्ती बसिरहेको गौरीशंकरको उकाली लाग्छु,
छेउको चौतारीमा बिसाउछु एकछिन ,
हेर्छु संसार र हेर्छु उसलाई,
ऊ मलाई हेरिरहेछ,
हिउँको चीसोलाई न्यानोमा बदल्न हाम्ले अँगालो हाल्यौ,
गन्तव्यमा फर्कंदा मभित्र पूर्णताको आभास भैरहेछ -
अहिले म म छुइन ,
ऊ ऊ छैन...

यो अनुभूति
शव्दमा छैन ...

कविता

प्रश्नको केन्द्रमा मान्छे
=================
डा. मधु माधुर्य

थुप्रै ज्यूँदा आहारहरु रेटेर
हामीलाई शक्तिको पुजारी बनाउने
बडा-दशैँ फेरिपनि हाम्रो घर-दैलोमा आउंदै छ |

सबैभन्दा सान्दर्भिक अभिव्यक्ति " बडादशैंको शुभकामना"
तुफान बनेर ब्रह्माण्ड घुमिरहेको छ
सुस्वास्थ्य, दीर्घायु र उत्तरोत्तर प्रगतिको कामना सुनाउंदै

हो -
दानवहरु फर्की रहेका छन्
लाग्छ -दानवहरु सँधै फर्की रहेका हुन्छन्
वा उनीहरुको मृत्यु मरिसकेको छ ...

कविता :

हेर्दा हेर्दै देश देश जस्तो छैन ...
- मधु माधुर्य

लाहुरे : यत्रो लक्का जवान
तिमी किन लाहुर नगएको ?
कान्छा: हेरन, के देखिरहेका छौ चारैतिर ?
देश नै परदेश भै सक्यो दाज्यू...
* * *
उत्पीडितहरुको सम्बाद सुनौं
कि देशको गुनासो ?

नेपाल आमा रोएर
अश्रुसागरमा डुबिरहेकी छिन् -